Yqvbmun

Quel articul chì l'è scrivüü in Lumbard ucidental, cun l'urtugrafia ünificada.

Segunda Curinz[<small>Mudifega</small> | mudìfica 'l sorgènt]

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Sett[<small>Mudifega</small> | mudìfica 'l sorgènt]

¹Dunca, perchè gh'èmm chèst prumèss, predilètt, me farìum nümm medemm pür^[1] d'ogni smagia^[2] de la carna e del spirit, cumpend^[3] la santitaa in de la pagüra de Diu. ²Feem un post, èmm ufès nissün, èmm rüinaa nissün, èmm prufitaa de^[4] nissün. ³Disi no de cundana, già che huu dii prima che in di voster cör sii per murì e viv insèma. ⁴Gh'huu tanta franchéza cun vialter, gh'huu tant de vantà per via de vialter; huu impienii cun cunsulaziún^[5], gh'huu püssee letizia che assee in d'ogni mia tribulaziún.
⁵Già che anca quand sun vegnüü in de Macedonia, la nostra carna l'ha avüü besogn de nissüna pusada^[6], ma in de tüsscoss turmentaa-- föra lott, denter pagüra. ⁶Ma lü che 'l cunsola^[7] i ümil, Diu 'l m'ha cunfurtaa cun la vegnüda de Tít: ⁷e no dumà in de la sua vegnüda ma anca in de la cunsulaziún che l'ha ricevüü de vialter^[8], intanta che 'l reporta a nümm la vostra brama, la vostra piangüda^[9], el voster zél^[10] per mì, perchè a gh'àbia püssee letizia. ⁸Perchè se anca v'huu faa trist in de la letera, me despias no; se anca 'l m'ha despiasüü (vardi che la chèla letera, se anca dumà^[11] per un'ura, la v'ha faa trist), ⁹adèss gh'huu letizia, no perchè sii staa faa trist, ma perchè sii staa faa trist a pentì^[12]: già che sii staa faa trist a möd de^[13] Diu, perchè avii perdüü nagott per via de nümm. ¹⁰Già che la tristéza a möd de Diu la prudüss pentimént a la salvéza che 'l despias no, ma la tristéza del mund la prudüss la mort. ¹¹Defàtt, varda chèsta medema cossa, el vèss faa trist a möd de Diu l'ha prudott in de vialter tanta diligénza, ma defes, ma indignaziún^[14], ma pagüra, ma brama, ma zél, ma giüstizia^[15]. In de tüsscoss ve sii recumandaa vialter medemm che sii sant in de chèsta^[16] cossa. ¹²Alura, se anca v'huu scritt no per via de lü che l'ha faa l'ufèsa né per via de lü che l'è staa ufès, ma per revelàv la vostra diligénza per nümm denanz a Diu. ¹³Per chèst, sèmm staa cunsulaa.
E ultra a la nostra cunsulaziún, tant püssee che assee gh'èmm avüü letizia ultra a la letizia de Tít, perchè 'l sò spirit l'è staa sulevaa de tücc vialter: ¹⁴perchè se me sun vantaa quajcossa a lü de vialter, sun minga staa vergugnaa, ma propi cumè v'huu dii tüsscoss in de veritaa, inscì el mè vant de Tìt l'è devegnüü veritaa. ¹⁵E la sua cumpassiún l'è tant püssee per vialter, intanta che 'l ghe regorda de l'übediénza de tücc vialter, cumè l'avii ricevüü cun pagüra e tremúr. ¹⁶Gh'huu letizia perchè gh'huu cunfidénza in de vialter in de tüsscoss.

1. ↑ o me nettarìum
2. ↑ o cuntaminaziún
3. ↑ o intanta che cumpum/cumpissum
4. ↑ o sfrütaa
5. ↑ o incuragiamént, anca in de 7 e 13
6. ↑ o requie
7. ↑ o incuragia, dò völt in de chèsta fras
8. ↑ leteralamént, la cunsulaziún cun la quala l'è staa cunsulaa sü vialter
9. ↑ o lamént
10. ↑ o passiún, anca in de 11
11. ↑ in del grech, la gh'è no dumà
12. ↑ leteralamént, al pentimént
13. ↑ leteralamént segund, anca in de 10 e 11
14. ↑ o sdègn
15. ↑ o vendèta
16. ↑ in del grech, la gh'è no chèsta

Navigaziun[<small>Mudifega</small> | mudìfica 'l sorgènt]

• ← Indree a Capitel Ses
• Inanz a Capitel Vott →
• A l'indes